1Cor 7 | BOJ | STEP | Ariya was qu, anjam qudei niŋgi nami neŋgreŋyosib e qa qariŋyeb qaji deqa e kamba olo niŋgi merŋgwai. Anjam bei niŋgi neŋgreŋyeb qaji agi uŋa oqajqa anjam. Deqa e kamba niŋgi endegsi merŋgwai. Tamo naŋgi uŋa oqasai di kumbra bole.

1 Corinthians 7

Pol a uŋa oqajqa kumbra qa anjam marej

1 Ariya was qu, anjam qudei niŋgi nami neŋgreŋyosib e qa qariŋyeb qaji deqa e kamba olo niŋgi merŋgwai. Anjam bei niŋgi neŋgreŋyeb qaji agi uŋa oqajqa anjam. Deqa e kamba niŋgi endegsi merŋgwai. Tamo naŋgi uŋa oqasai di kumbra bole. 2 Ariya nuŋgo ambleq di sambala kumbra kobaaim deqa niŋgi segi segi uŋa oiye. Uŋa niŋgi dego segi segi tamo oiye. 3 Tamo naŋgo jejamu di naŋgo ŋauŋ qa. Deqa tamo naŋgi naŋgo jejamu getentaib. Uŋa naŋgo jejamu di dego naŋgo gumbuluŋ qa. Deqa uŋa naŋgi dego naŋgo jejamu getentaib. 4 Uŋgasari naŋgi na naŋgo segi jejamu taqatosaieqnub. Naŋgo jejamu di naŋgo gumbuluŋ na taqateqnub. Tamo naŋgi dego naŋgo segi jejamu taqatosaieqnub. Naŋgo jejamu di naŋgo ŋauŋ na taqateqnub. 5 Deqa niŋgi nuŋgo jejamu getentaib. Ariya bati bei niŋgi nuŋgo uŋa wo ombla areqalo qujaitosib pailyqa bati atsib di niŋgi nuŋgo jejamu getentosib pailyoqniye. Ariya bunuqna pailyo bati koboamqa niŋgi nuŋgo jejamu olo turtiye. Niŋgi degyqasai di niŋgi nuŋgo segi jejamu geregere taqatqa keresai deqa Satan a na niŋgi osim sambala kumbraq olo waiŋgwas. 6 Ijo anjam di e na niŋgi aqaryaiŋgwa osim deqa merŋgonum. Anjam di niŋgi dauryqajqa deqa e tulaŋ siŋgila na merŋgosai. 7 E are qalonum, tamo kalil naŋgi e bul laŋa sqab di bole. Ariya Qotei na tamo naŋgi siŋgila segi segi enjreqnu. A na tamo qudei naŋgi siŋgila bei enjreqnu. Osiqa olo tamo qudei naŋgi siŋgila bei enjreqnu.

8 Ariya tamo uŋgasari uŋa ti tamo ti sosai qaji naŋgi e na anjam endegsi minjrqai. Uŋa qobul naŋgi dego e na anjam endegsi minjrqai. Niŋgi e bul laŋa sqab di bolequja. 9 Ariya niŋgi nuŋgo segi jejamu taqatosib laŋa sqa keresaiamqa niŋgi uŋa oiye. Niŋgi tamo oiye. Niŋgi laŋa sosib olo sambala kumbra yqa are prugŋgwas di kumbra bolesai.

10 Ariya niŋgi tamo ti uŋa ti unub qaji e na dal anjam endegsi merŋgwai. E segi na niŋgi merŋgwasai. Tamo Koba Yesus a dego niŋgi merŋgwas. Aqa dal anjam agiende. Uŋa niŋgi na nuŋgo tamo naŋgi uratnjraib. 11 Ariya uŋa bei na aqa tamo uratqas di a olo tamo bei aiq. A laŋa soqnem. Ariya a laŋa sqa keresaiamqa a na olo aqa tamo nami uratej qaji di olo eme. Tamo naŋgi dego naŋgo uŋa naŋgi uratnjraib.

12 Ariya niŋgi qudei e na anjam endegsi merŋgwai. Tamo Koba Yesus a na niŋgi merŋgwasai. E segi na merŋgwai. Ni Kristen tamo. Ariya ino ŋauŋ a Kristen uŋa sai. Di uŋgum. Ni a urataim. A ni ombla sqa are soqnim ni a urataim. 13 E uŋa naŋgi dego anjam di minjrqai. Ni Kristen uŋa. Ariya ino gumbuluŋ a Kristen tamo sai. Di dego uŋgum. Ni a urataim. A ni ombla sqa are soqnim ni a urataim. 14 Niŋgi quiye. Tamo bei a Yesus qa aqa areqalo siŋgilatosai. Ariya a Kristen uŋa oqas. Kumbra dena a Kristen naŋgo miligiq aisim Qotei aqa jojomq di sqas. Uŋa bei dego a Yesus qa aqa areqalo siŋgilatosai. Ariya a Kristen tamo oqas. Kumbra dena a Kristen naŋgo miligiq aisim Qotei aqa jojomq di sqas. Degsi sqasai di naŋgo aŋgro naŋgi Qotei aqa ŋamgalaq di jiga ti sqab. Ariya bini naŋgi Kristen naŋgo miligiq di unub deqa naŋgi jiga ti sosai. 15 Ariya Kristen tamo bei aqa uŋa a Yesus qa aqa areqalo siŋgilatosai. Deqa uŋa dena tamo di uratqa marsim uratem. Tamo a deqa une saiqoji. A uratqasai di a tonto talq di sobulqas. Kristen uŋa dego aqa tamo a Yesus qa aqa areqalo siŋgilatosai. Deqa tamo dena uŋa di uratqa marsim uratem. A dego une saiqoji. A uratqasai di a tonto talq di sobulqas. Qotei a niŋgi nuŋgo Kristen was qu naŋgi koba na geregere sqajqa metŋgeqnu. Deqa niŋgi ijo anjam di dauryiye. 16 O uŋa, ni na ino gumbuluŋ Qotei aqa anjam minjimqa a are bulyqas kio sai kio di ni qalieqasai. O tamo, ni dego ino ŋauŋ Qotei aqa anjam minjimqa a are bulyqas kio sai kio di ni qalieqasai.

Gam Qotei na iga segi segi dauryqa marsiq giltgej qaji di iga dauryosim sqom

17 Gam Qotei na iga segi segi dauryqa marsiq giltgej qaji di iga dauryosim sqom. Iga nami gam kie dauryosim sonamqa Qotei na iga metgej degsim olo dauryosim sqom. Anjam di agi e na Kristen tamo uŋgasari sawa sawa kalilq dia koroosib loueqnub qaji naŋgi minjre minjre laqnum. 18 Niŋgi qudei nami muluŋ aisib sonabqa Qotei na niŋgi metŋgej deqa niŋgi degesoqniye. Niŋgi qudei nami muluŋ aiosai degsib sonabqa Qotei na niŋgi metŋgej. Niŋgi dego degesoqniye. Niŋgi olo muluŋ aiaib. 19 Niŋgi muluŋ aieb kio niŋgi muluŋ aiosai kio di laŋa. Ariya niŋgi Qotei aqa dal anjam dauryqab di kumbra bole utru ti. 20 Iga nami kiersim sonamqa Qotei na iga metgej degsim sqom. 21 Niŋgi qudei kaŋgal tamo sonabqa Qotei na niŋgi metŋgej. Ariya niŋgi deqa are gulubeiŋgaiq. Niŋgi degsib soqniye. Ariya bunuqna niŋgi kaŋgal tamo sqa uratosib olo nuŋgo segi wau ojqa gam soqnimqa olo degyiye. 22 Tamo naŋgi kaŋgal tamo sonabqa Qotei na metnjrej qaji naŋgi Tamo Koba Yesus aqa. Deqa naŋgi aqa ŋamgalaq di kaŋgal tamo sosai. Dego kere tamo naŋgi kaŋgal tamo sosai sonabqa Qotei na metnjrej qaji naŋgi olo Kristus aqa kaŋgal tamo bul unub. 23 Qotei a awai kobaquja na niŋgi awaiŋgej. Deqa niŋgi tamo bei aqa kaŋgal tamo saib. 24 O was qu, iga nami kiersim sonamqa Qotei na iga metgej degsim olo Qotei ombla sqom.

Tamo uŋa osai qaji naŋgi ti uŋa tamo osai qaji naŋgi qa ti Pol a anjam marej

25 Ariya e na tamo naŋgi uŋa ti sosai qaji naŋgi Tamo Koba Qotei aqa dal anjam bei minjrqasai. E ijo segi areqalo na naŋgi anjam bei endegsi minjrqai. Tamo Koba Qotei a e qa tulaŋ dulej deqa e qalieonum, ijo anjam endi bole. 26 E endegsi are qalonum. Bini bati endeqa gulube kokba bqa jojomeqnub deqa niŋgi kalil kiersib unub degsib olo soqniye. 27 Niŋgi uŋa ti unub qaji niŋgi degsib soqniye. Niŋgi nuŋgo uŋa olo uratqa gam ŋamaib. Niŋgi uŋa osai qaji niŋgi dego degsib soqniye. Niŋgi olo uŋa oqa are qalaib. 28 Ariya niŋgi uŋa oqab di kere. Di niŋgi unetosai. Duŋgeŋge naŋgi dego tamo oqab di kere. Di dego naŋgi unetosai. Ariya tamo naŋgi uŋa oqab qaji naŋgi mandamq endia gulube koba oqab. Niŋgi gulube di aib deqa e na anjam endi niŋgi merŋgonum.

29 O was qu, diŋo bati jojomqo deqa e na niŋgi endegsi merŋgwai. Tamo naŋgi uŋa ti unub qaji naŋgi uŋa saiqoji so bul soqnebe. 30 Tamo naŋgi akameqnub qaji naŋgi akamosai bul soqnebe. Tamo naŋgi areboleboleinjreqnu qaji naŋgi areboleboleinjrosai bul soqnebe. Tamo naŋgi iŋgi iŋgi awaiyeqnub qaji naŋgi iŋgi iŋgi saiqoji so bul soqnebe. 31 Tamo naŋgi mandam qa iŋgi iŋgi qa waueqnub qaji naŋgi iŋgi iŋgi qa wauosai bul soqnebe. Niŋgi qalie, sokiñala mandam ti aqa iŋgi iŋgi kalil ti torei koboqab.

32 O was qu, niŋgi mandam qa iŋgi iŋgi qa are gulubeiŋgim areqalo bei bei aib deqa e na niŋgi anjam endegsi merŋgwai. Niŋgi qalie, tamo uŋa ti sosai qaji naŋgi Tamo Koba Yesus aqa kumbra dauryqajqa are qaloqnsib unub. Deqa kumbra Yesus a tulaŋ areareteqnu qaji di naŋgi yoqnsib unub. 33 Ariya tamo naŋgi uŋa ti unub qaji naŋgi mandam qa iŋgi iŋgi qa are qaloqnsib unub. Deqa kumbra naŋgo uŋa a areareteqnu qaji di naŋgi yoqnsib unub. 34 Deqa naŋgi areqalo aiye aiyeltoqnsib unub. Duŋgeŋge naŋgi ti uŋa naŋgi tamo osai qaji naŋgi ti dego Tamo Koba Yesus aqa kumbra dauryqajqa are qaloqnsib unub. Deqa naŋgi Qotei aqa kumbra boleq di sosib naŋgo segi jejamu ti qunuŋ ti torei Qotei yekriteqnub. Ariya uŋa naŋgi tamo ti unub qaji naŋgi mandam qa iŋgi iŋgi qa are qaloqnsib unub. Deqa kumbra naŋgo tamo a areareteqnu qaji di naŋgi yoqnsib unub. 35 E niŋgi aqaryaiŋgwa osim deqa anjam di niŋgi merŋgonum. E na niŋgi gulube eŋgwajqa deqa anjam di merŋgosai. Niŋgi kumbra bole dauryoqnsib gaigai Tamo Koba Yesus aqa wau ojsib sqajqa deqa osim anjam di niŋgi merŋgonum. Yim kumbra bei na niŋgi titŋgim niŋgi olo areqalo bei bei o uge.

36 Ariya tamo bei aqa duŋge kobaqujaosim tamo oqa kereamqa a endegsi are qalqas, “Ijo duŋge a laŋa sqa keresai. Deqa e na a tamo oqa getentqasai. Getentit bati olekoba gilqas di uge. Deqa uŋgum. A tamo em.” A degsi are qalqas di kere. A une atosai. 37 Ariya tamo bei a endegsi are qalqas, “E qalieonum, ijo duŋge a laŋa sqa kere. Deqa e na getentqai. Yim a tamo oqasai.” A degsi are qalsimqa aqa segi areqalo dauryosim aqa duŋge getentqas di kere. A dego une atosai. 38 Deqa tamo bei na aqa duŋge odyim a tamo oqas di a kumbra bole yqo. Ariya tamo bei na aqa duŋge getentim a tamo oqasai di a kumbra tulaŋ boledamu yqo.

39 Uŋa bei aqa tamo a moiosaisoqnimqa uŋa dena tamo di uratqa keresai. Ariya a moiimqa di a olo tamo bei oqa osim em. Ariya a na Kristen tamo segi olo em. 40 Ariya ijo areqalo agiende. Uŋa di a olo tamo bei oqa uratosim laŋa sqas di a areboleboleiyim sqas. Qotei aqa Mondor a ijoq di unu deqa e anjam di niŋgi merŋgonum.